C'l artìcul chè 'l è scrit in
Miranduléś |
La Sabine Katharina Lisicki (Troisdorf, 22 ad Setémbar dal 1989, a s lèś [zaˈbiːnə lɨˈzɪki] in Tedésc) l'è na tenìsta tedésca prufesiunìsta da 'l 2006 fiōla ad genitōr pulàc. La s è stablìda a Bradenton in Flòrida. L'è élta 178 cm e la péśa 70 chilo e la pōl cuntàr su òṅ di servìsi più fòrt dal sircùit dal fémni.
La dascór bèṅ in Tedésc, in Ingléś e in Pulàc.
L'è stada la nùmar dódas dal mónd al 21 ad Maǵ dal 2012 e in dla sò caréra l'à vins tri tìtui WTA: in sla tèra vérda, in sl'èrba e in sal cimènt, muciànd sù anc quàtar finàli pò pardùdi. In dópi l'à śugâ, sénsa vìnsar, la finàl ad Wimbledon dal 2011 insém a la Samantha Stosur.
In di Gran Slam l'è rivàda in semifinàl a Wimbledon in dal 2011, dasfrutànd a la granda na carta salvàdga ch'i gh'ìvan dâ.
La Sabine la s fà i òs śugànd in fiṅ a 'l 2004 in dla scóla ad Nick Bollettieri a Bradenton. In dal 2007 la taca a muntàr sù in clasìfica pasànd da 'l 497 pòst a 'l 198, vinsénd anc dū tìtui ITF.
In dal 2008, baténd in d'l at cuncluśìṿ dal qualificasiòṅ la Nastas'sja Jakimava, la s fà nutàr a gl'Australian Open parchè la fà fóra subìt la Dinara Safina par 7-6 4-6 6-2 prima ad lasàr strada in tri sét a la Caroline Wozniacki a 'l tèrs tùran. In Favràr la pèrd a 'l prim tùran a Doha da l'Amélie Mauresmo e pò a Memphis da la Lindsay Davenport. A Miami l'è bòna ad rivàr a 'l quàrt tùran pardénd da l'Elena Dement'eva 3-6 2-6 ma mandànd a cà la nùmar siē dal mónd Anna Čakvetadze. In Maǵ la śōga a Berlîṅ pardénd da la Sybille Bammer par 3-6 6-1 6-7. In tri turnèo estìṿ in sl'èrba la mùcia sù tri scunfìti ad fila p'r òpra ad Samantha Stosur, Angelique Kerber e Marion Bartoli. A Cincinnati la riva a 'l tèrs tùran (2-6 6-1 1-6 da la Marija Kirilenko) ma la fà méj a Tashkent in dua la śōga e pèrd la sò prima finàla WTA (6-2 4-6 6-7 da la Sorana Cîrstea). La sèra 'l an a 'l 54śum pòst in clasìfica.
Dòp avér patî na scunfìta a 'l secónd tùran di Australian Open p'r òpra dla Samantha Stosur, in dal Favràr dal 2009 la s fà strada a Memphis baténd via via in dū sét còmad l'Ekaterina Bychkova, la Stéphanie Foretz Gacon e la Lucie Šafářová, prima ad lasàr-'g al péni cun la Viktoryja Azaranka (4-6 6-3 6-7 al puntéǵ). A Indian Wells (6-7 5-7 da l'Elena Vesnina) e a Miami (2-6 4-6 da l'Iveta Benešová) la pèrd subìt ma chè l'è almànc bòna ad dar la paga a la Petra Kvitová. In Avrìl a riva finalmènt al sò prim tìtul WTA in sla tèra vérda ad Charleston: chè la tedésca la mét in riga tri top quìndas cuma la Venus Williams, la Marion Bartoli e, in finàl, la Caroline Wozniacki par 6-2 6-4, sénsa lasàr par strada gnanc un sét. A Stucàrda la bat subìt la nùmar vint dal mónd Patty Schnyder ma pò la céd p'r un pēl a la Jelena Janković par 5-7 7-5 3-6. A Esturìl la bat la Kirsten Flipkens e l'Elena Bovina ma pò la và fóra a 'l tèrs tùran pardénd da l'Anna-Lena Groenefeld. Dòp dū prim tùran a 'l Roland Garros (2-6 6-1 1-6 da la Lucie Šafářová) e a Eastbourne (2-6 1-6 da la Samantha Stosur) la śōga un Wimbledon da incurniśàr baténd la nùmar sinc dal mónd Svetlana Kuznecova 6-2 7-5 (vinsìdōra dal Roland Garros e la nùmar nóṿ Caroline Wozniacki 6-4 6-4 prima ad cédar in di quàrt a la nùmar òṅ Dinara Safina 7-6 4-6 1-6. Dòp soquànt turnèo americàṅ andâ minga tant bèṅ e 'n prim tùran a Pechîn (0-6 0-1 bandòṅ cun la Francesca Schiavone), la riva in finàl in Lussembûrg ma chè la pèrd da la Timea Bacsinszky par 2-6 5-7. La finìs 'l an cuma nùmar vint-a-tri dal mónd, cun un record in bisàca: qvél dal servìsi tirâ più fòrt par na dóna: 210 km/h a Bali.
In dal 2010 la taca 'l an mâl pardénd subìt in tri sét da la Viktoryja Azaranka a Sydney e a 'l secónd tùran di Australian Open p'r òpra dl'Alberta Brianti, dòp avér mandâ a cà la Petra Martić. Dòp 'n àtar secónd tùran a Pattaya city (3-6 6-3 5-7 da la Tamarine Tanasugarn) e a Dubai (2-6 3-6 da la Venus Williams), in Mars a Indian Wells e a Miami l'è custréta a dar-ag sù par di prubléma a la fèrla, lasànd strada a la Jill Craybas e a la Jaroslava Švedova. La tórna a śugàr in Agóst ma la fà fadìga a turnàr a i sò livèi (in di turnèo WTA l'è bòna ad batàr sōl la Coco Vandeweghe a gl'US Open). La sèra la stagiòṅ a n pasànd minga al qualificasiòṅ in Lussembûrg (5-7 4-6 da l'Eleni Daniilidou) e la cróda acsè dimóndi śò in clasìfica, a 'l 179śum pòst.
A 'l inìsi dal 2011 l'è custréta a pasàr p'r al qualificasiòṅ par śugàr a Auckland e a Melbourne: la i pasa sōl in dal turnèo neo-śelandéś ma pò la gh'à da far i cònt cun la Yanina Wickmayer a 'l secónd tùran ch'la la bat 6-2 3-6 6-2. A Indian Wells la và a cà subìt (6-4 6-7 2-6 da la Sorana Cîrstea), a Miami invéci la bat la Nadia Petrova 4-6 6-3 3-1 bandòṅ prima 'd èsar asfaltàda da la Marija Šarapova 2-6 0-6. A Charleston la riva a 'l tèrs tùran baténd la Marion Bartoli 6-2 6-3 ma pardénd pò da l'indiàna Sania Mirza. A Stucàrda la manda a cà la Dominika Cibulková 7-5 7-6 e anc la Na Li 6-4 7-5 prima ad cédar a la Julia Görges 6-4 6-4. Par muciàr sù di punt la và a śugàr in Maǵ dū ITF a Praga e a Réś, pardénd da la Mandy Minella a 'l secónd tùran dal turnèo céc e in semifinàl da la Sloane Stephens in qvél emigliàṅ. A salvàr-ag la stagiòṅ i rìv'n i turnèo in sl'èrba. A Birmingham la vins al tìtul dand la paga a la Daniela Hantuchová 6-3 6-2 mént'r a Wimbledon la riva in semifinàl baténd incóra la Na Li (ch'la gh'iva in bisàca al tìtul dal Roland Garros) e la Marion Bartoli prima ad cédar a la Marija Šarapova par 4-6 3-6. Anc a Stanford la s fà strada baténd in d'l órdan la Simona Halep 6-1 6-2, la Samantha Stosur 6-3 7-5 e l'Agnieszka Radwańska 7-6 2-6 6-2. In semifinàl però la cata na Serena Williams, nùmar 169 dal mónd in alóra, ch'la gh fà magnàr la pólvra. Dòp i quàrt a Carlsbad, la vins al tìtul a Dallas vinsénd sinc incóntar sénsa lasàr gnanc un sét par strada e sōi trédas śōg a chi atri. A gl'US Open la riva a 'l quàrt tùran pardénd da la nùmar dū dal mónd Vera Zvonarëva par 2-6 3-6. La finìs 'l an cun un prim tùran a Linz (5-7 6-4 3-6 da la parmśàna Alberta Brianti) a 'l 15śum pòst dal ranking.
In dal 2012 la taca 'l an śugànd a Auckland. Chè la bat la Mona Barthel par 7-6 3-6 6-3 ma pò la gh'à da bandunàr in di quàrt in sal puntéǵ ad 4-6 3-4 cóntar cl'atra tedésca, l'Angelique Kerber. A gl'Australian Open la dà la paga a la Svetlana Kuznecova 2-6 6-4 6-2 prima ad pèrdar in di utàṿ da la Marija Šarapova 6-3 2-6 3-6. La cata incóra la Kerber in dal prim tùran ad Doha e la gh pèrd incóra. A Miami la céd a 'l quàrt tùran a la Na Li 6-3 4-6 2-6, acsè cuma a Charleston (1-4 bandòṅ da la Serena Williams). In sla tèra rósa la patìs tri prim tùran ad fila, 'l ùltim a 'l Roland Garros ad òpra dl'americàna Bethanie Mattek-Sands (4-6 3-6). La sèra 'l sérc cun 'n àtar scunfìta subìt a Birmingham (3-6 4-6 da l'Urszula Radwańska). A Wimbledon invéci a pâr ch'la pòsa far cuma 'l an pasâ parchè la bat via via la Petra Martić 6-4 6-2, la Bojana Jovanovski 3-6 6-2 8-6, la Sloane Stephens 7-6 1-6 6-2 e la vinsìdóra dal Roland Garros e nùmar òṅ dal mónd Marija Šarapova 6-4 6-3. In di quàrt però la patìs la tèrsa scòpla d'l an par l'Angelique Kerber ch'la la manda a cà in di quàrt par 6-3 6-7 7-5, cun la Lisicki ch'l'éra andàda a sarvìr p'r al match dòp avér salvâ a sò vòlta quàtar bucìni d'l incóntar a la śugadōra ad Bréma. Dòp che la siberiàna la s tōś l'arvìnsida sèg a gl'Ulimpìadi, la tedésca l'è bòna ad vìnsar sōl 'n incóntar da lè a la fiṅ d'l an, pardénd-an siē, e la ślìcia acsè a 'l 37śum pòst in clasìfica.
Al 2013 al taca cun dū scunfìti a Brisbane (3-6 3-6 da la Viktoryja Azaranka) e a Melbourne (6-2 3-6 3-6 da la Caroline Wozniacki) ma a Pattaya la riva in finàl in dua la pèrd da la Marija Kirilenko par 7-5 1-6 6-7. Stés quèl anc a Memphis ma chè l'è custréta a dar-'g a muć dòp al prim sét pardû 6-1 cóntar la Marina Erakovic. Fra Miami, Charleston e Katowice la pòrta a cà sōl na partìda. A la fiṅ 'd Avrìl la śōga al turnèo ad cà ad Stucàrda. Chè la bat a 'l prim tùran la rumàna Nastassja Burnett par 6-3 6-4 e pò anc la Jelena Janković par 7-6 7-5, prima ad lasàr-'g al péni in di quàrt cóntar na Bethanie Mattek-Sands cun al diav'l adòs. A Madrid la bat la Dominika Cibulková ma a 'l tèrs tùran la và fóra p'r òpra dla Marija Šarapova. A Róma la tedésca la fà patìr in dal secónd tùran un 6-0 a la Petra Kvitová ma a n è minga abàsta par vìnsar sèg. A 'l Roland Garros invéci l'è lē ch'l'al patìs da la Sara Errani in di sedicéśum quànd la rumagnōla la la bat 6-0 6-4. In tut i caś, al tèrs tùran purtâ a cà 'l è al sò riśultâ più bèl dla sò caréra in dal Gran Slam francéś. La taca la stagiòṅ in sl'èrba a Birmingham e la sò córsa la s férma in di quàrt a surpréśa cóntar la nùmar 167 dal mónd Alison Riske. In Śugn la tōś part a 'l turnèo ad Wimbledon. Chè la bat la Francesca Schiavone 6-1 6-2, l'Elena Vesnina 6-3 6-1 e l'austragliàna Samantha Stosur par 4-6 6-2 6-1. In di utàṿ la śōga cun la nùmar òṅ dal mónd, la Serena Williams, ch'la daśgnìva da trénta-quàtar vìnsiti ad fila, a na partìda sōla da 'l rècord di an Dumìla ad sò surèla Venus Williams. La tedésca la s pòrta avànti 6-2 1-0 prima ad patìr na sfilaràda ad nóṿ śōg ad fila e catàr-as acsè sóta 0-3 in dal sét deciśìṿ. Quànd a pâr ch'la sia finìda, la Sabine la s fà sóta faghénd al break in sal quàtar para par pò vìnsar 6-2 1-6 6-4. Par quàtar vòlti, da 'l 2009 a 'l 2013, la tedésca l'è stada bòna a Wimbledon ad far fóra la vinsidōra dal Roland Garros. Sōl in dl'edisiòṅ dal 2010 la maledisiòṅ la n è minga scrucàda cun la Francesca Schiavone ma sōl parchè la Lisicki la n à minga śugâ al turnèo. Al dè dòp, baténd 6-3 6-3 la Kaia Kanepi, la Sabine la riva par la secónda vòlta in caréra in dla semifinàl dal turnèo lundinéś in dua la fà fóra par 6-4 2-6 9-7 la finalìsta d'l an prima, l'Agnieszka Radwańska. Al 6 ad Luj la tedésca la śōga la sò prima finàla in un turnèo dal Gran Slam cun la francéśa Marion Bartoli e la taca bèṅ tulénd-ag subìt al servìsi ma la còrsa l'insfìlsa pò siē śōg ad fila. La Lisicki la próa a squasàr-as in dal secónd sét quànd la gh'à quàtar bucìni p'r al 2-0 ma 'l è 'n fōg ad paja parchè la Bartoli la s pòrta invéci 5-1 par lē, par pò saràr la partìda par 6-1 6-4.
Wimbledon | 2013 | P | Marion Bartoli | 1-6 4-6 |
© MMXXIII Rich X Search. We shall prevail. All rights reserved. Rich X Search